Descontentu pol resultáu del debate sobre la especialidá d'asturianu na Xunta Xeneral

Fonte: asturies.com

SUATEA, Xunta pola Defensa de la Llingua, Bloque por Asturies y UNA llamentaron güei'l resultáu del debate sobre la especialidá d'asturianu na Xunta Xeneral, nel que s'alcordó pidir un estudiu xurídicu sobre l'asignatura

El Sindicatu Unitariu Autónomu de Trabayadores de la Enseñanza d'Asturies (Suatea) tachó güei de "circu" y "ópera bufa" l'aprobación unánime güei na Xunta'l Parlamentu de la moción del PP que pidía al Estáu la reconocencia de la especialidá docente de Llingua Asturiana y acabó enmendada como solicitú d'un estudiu sobre tal posibilidá. Pela so parte, el Bloque por Asturies, como integrante d'IU-BA-Verdes tachó d'hipócrita l'actitú del PP al aceptar les enmiendes del PSOE, en llugar de aprobala col apoyu suficiente ofrecíu por esta coalición.
El sindicatu recordó qu'enantes de les eleiciones europees "valoró mui positivamente la iniciativa del Partíu Popular", y mostró la so confianza en que "la coherencia tuviera penriba de les rivalidaes polítiques, y qu'aquellos que teóricamente mos representen lo ficieren de verdá, aprobando la proposición sobre la Llingua Asturiana y el Gallego-Asturiano".
"Güei nel Parlamentu Asturianu representóse una ópera bufa que dexó bien a les clares que lo que se dixo nel so día nun foi más qu'un trucu electoralista", opinó la organización nun comunicáu. "Toos trayíen la lleición deprendía de casa hasta'l puntu de que la cama redonda final de los trés partíos paecía inevitable. El resultáu nun foi otru q'un apoyu unánime a una enmienda del PSOE que recoyía puntu por puntu les imprecisiones que sobre l'asturianu tan nel pactu de gobiernu. ¿Formaráse un gobiernu de concentración?. Paez q'empiecen a reconocese y que toos son los mesmos", entrugó'l sindicatu.
Suatea recordó qu'otros "organismos europeos solicitaron mayor proteición pa la llingua asturiana; que, hai agora un añu, 'El Conseyu Escolar del Estáu' (muérganu máximu de representación de la comunidá educativa del estáu español) aprobó, a instancies de Suatea la creación de la especialidá de Llingua Asturiana y Gallego-Asturiano, y hasta la Universidá apostó pola llingua en varies ocasiones colos cursos d'espertos y especialistes, o agora cola especialidá dientro de los planes d'estudiu". "Los nuesos políticos nun s'enteren, ¿por inorancia, por inconsciencia o por mala lleche?", acaben.
"ESPECTÁCULU BOCHORNOSU"
La Xunta pola Defensa de la Llingua Asturiana tamién emitió comunicáu en que califica de "bochornosa" la situación vivida na Xunta Xeneral. La organización, que valoró, nel momentu de la so presentación, como mui positiva la proposición non de llei presentada pol Partíu Polpular pa la creación de la especialidá de Llingua Asturiana nel sistema educativu, llamentó asistir na sesión plenaria d’esta mesma mañana "al espectáculu bochornosu amosáu polos dos partíos mayoritarios nel debate de la proposición; d’una banda’l PSOE que presentó dos enmiendes dirixíes esclusívamente a dexar la proposición ensin efectu y convertila en papel moyáu y d’otra banda’l Partíu Popular, que fexo un exerciciu de cinismu políticu vergonzosu y intolerable". Acordies cola xunta, "nun tien sentíu tien que se vincule la creación de la especialidá de Llingua Asturiana a la confección d’un estudiu xurídicu cuando yá hai un estudiu fechu -a encargu d’esti mesmu gobiernu- que fai una valoración favorable a la creación de la especialidá, y con ello vuelve a rescamplar la oposición frontal del PSOE a cualquier avance hacia la dignificación de la llingua asturiana, incluso en casos como esti nos que nun pon reparu n’enfrentase a l’aplicación de sentencies xudiciales". La organización remembra como "una sentencia reciente del Tribunal Supremu calificaba como illegales les plantíes funcionales de docentes y desixía la so inclusión na plantía orgánica de los centros, lo qu’implica necesariamente la creación de la especialidá pal profesoráu de llingua asturiana".
Tocantes al PP, la Xunta condena que "teniendo votos suficientes p’aprobar la so propia proposición decide, in extremis, dexala ensin efectu incorporando les enmiendes presentaes pol PSOE. Evidenciando de manera penosa que nunca esistió per parte del grupu popular intención de collaborar na dignificación de la llingua asturiana, nin esiste n’ellos molición nenguna pola situación llaboral marxinal na tienen qu’exercer el profesoráu d’asturianu.

El PP decidió retirar la so propia proposición non de llei énte’l riesgu de que fuera aprobada y pudiera valir pa meyorar la presencia de la llingua asturiana nel sistema educativu".

La Xunta pola Defensa de la Llingua Asturiana "condena esta instrumentalización de la llingua asturiana como elementu de confrontación política y valora l’exemplu de xenerosidá política amosáu por Izquierda Xunida al ufrir los sos votos ensin condiciones al Partíu Popular" anque "llama a la reflexón n’Izquierda Xunida sobre la so participación nun gobiernu qu’agrede sistemáticamente los derechos llingüísticos más elementales y que sigue col oxetivu claru d’esterminar el patrimoniu llingüísticu asturianu nel menor plazu posible".
"HIPÓCRITES"
Pela so parte, el Bloque d'Asturies, integrante d'IU-BA-Verdes entrugó "agora quiénes sons los fariseos y los hipócrites", en referencia a los diputaos del PP.
"Tamos asustaos col esperpentu del Partíu Popular na votación de la especialidá d'Asturianu. Dempués de facer populismu y xugar colos maestros d'asturianu y cola dignificación de l'asignatura, nun tienen nenguna vergoña en refugar los votos del grupu parlamentariu de Izquierda Xunida-Bloque por Asturies-Verdes pa sacar alantre una proposición non de llei qu'ellos mesmos presentaron", señaló'l testu.
Esplicó de la mesma manera'l Bloque que'l so grupu parlamentariu "presentó dos enmiendes qu'meyoraben la propuesta inicial del PP, como son la inclusión del Bachilleratu y llamar l'asignatura pol so nome, llingua asturiana, y éstos refugáronla". "Lo realmente surrealista", continuó'l comunicáu "ye ver cómo depués de retirar les nuestres enmiendes y tar dispuestos a votar la qu'ellos presentaron, el PP refugó l'apoyu d'IX-Bloque-Los Verdes p'aprobar una enmienda propia. Les preguntes son ¿Quiénes son los fariseos y los hipócrites? y ¿pue ser alternativa de Gobiernu una fuerza que nun vota les sos propies propuestes? Nun sabemos cúal va ser el próximu capítulu pero sí'll final y quién va perder, la llingua asturiana", señaló la formación.
Pal Bloque "a estes altures ta claro cuála ye la seriedá del PP col tema de la llingua asturiana, ta claro que son parte del problema y non de la solución, que namás faen oportunismu políticu, ficiéronlu col estatutu, nes elecciones y tamos seguros que van siguir faciéndolu".
A lo último, la formación esplicó que "evidentemente, con esti cambiu de postura del Partíu Popular, vímonos na obligación de votar a favor y nun ser la única fuerza política que se niega a pidir un estudiu xurídicu, dalgo que nun diba entender naide que quiera un futuru meyor pa la llingua asturiana".

"ENGAÑU IMPRESENTABLE"
Pel so llau educación d’Unidá Nacionalista Asturiana consideró que l’actitú de los grupos políticos con representación nel parlamentu asturianu tocante a la creación de la especialidá d’asturianu ye “un engañu impresentable” en tanto que representa “una maniobra política que nun fai más que poner torgues a la concesión d’unos derechos llaborales incuestionables siguiendo la política que meyor se-y da a la Federación Socialista Asturiana, la de impedir sistemáticamente cualesquier avance nos derechos llingüísticos n’Asturies”.

La formación nacionalista recordó que la proposición pactada polos grupos PSOE y PP “ye más de lo mesmo y nun busca otro que ganar tiempu cola aprobación d’unes midíes que non solo yá taben presentes nel pactu de Gobiernu sinón qu’amás yá fueron tomaes hai unos años pol propiu executivu”.

Asina, UNA defín como “alloriante” qu’un de los puntos del alcuerdu tomáu ente les dos fuerces polítiques seya l’encargu d’un informe sobre la posibilidá de creación de la especialidá “cuando saben de sobra qu’esi informe yá esiste, porque ellos mesmos lu encargaron, y que diz claramente que nun hai pega pa la creación de la especialidá”.

UNA tamién llamenta nel so comunicáu "la cobardía del grupu parlamentariu d’IU-BA que, formando parte del pactu de Gobiernu nun ye quien a presionar a los sos socios pa que garanticen una de les cuestiones fundamentales pa la sobrevivencia de la llingua d’Asturies, la so presencia digna dientro del sistema educativu y tán presos d’un pautu de gobiernu inoperativu, indignu y denigrante”.

El PP lleva al plenu de la Xunta del xueves la so moción a favor de la creación de la especialidá docente d'Asturianu

Fonte: asturies.com

El plenu ordiariu de la Xunta Xeneral va aldericar el xueves una propuesta non de Llei del Grupu Parlamentariu Popular sobre la creación de la especialidá d'asturianu pal profesoráu qu'imparte esta enseñanza n'educación infantil, primaria y secundaria.Trátase d'una proposición non de llei que presentaron el pasáu 19 de mayu los diputaos populares Joaquín Aréstegui y Emilio Pérez Cueva pa esixir la execución d'una midida plantegada pola Plataforma de Profesores de Llingua Asturiana y polos sindicatos.
Dambos parlamentarios afirmaron naquella ocasión nun entender por qué "s'esclúi al profesoráu d'asturianu de la plantiya orgánica", na que recordaron que s'incluyeren el restu de materies. Criticaron que, d'esta manera, los profesores d'asturianu tán condenaos a ser interinos, sin opción a algamar plaza nuna oposición nin participar en concursos de tresllaos.
Pérez Cueva pidió poro la reconocencia de la especialidá en primer llugar, pero tamién la "correspondiente convocatoria d'oposiciones y el concursu de tresllaos", aspeutos que diba conllevar l'aprobación de la midida.
Aréstegui recordó que nel añu 2005 "s'aprobó'l Plan de Normalización 2005-2007, que garantizaba la enseñanza del asturianu y plantegaba la realización d'un estudiu xurídicu sobre la posibilidá de reconocer la especialidá". "Hasta agora nun se fizo nada", protestó'l parlamentariu popular, matizando que tanto nel 2005 como nesti momentu hai un gobiernu de coalición ente PSOE y IU.
Na so opinón, los dos partíos que formen l'Executivu asturianu caltienen "dos actitudes". "El PSOE nun tiene nengún entusiasmu y se dedica a firmar acuerdos que nun cumplen, polo que nun va facer nada", criticó.
Izquierda Unida, continuó, "caltién una postura farisaica porque s'enllena la boca cola defensa del asturianu, pero tampoco fai nada, cuando se trata d'avances concretos". "Pa ver qué grupos tán dispuestos a cumplir la so pallabra", Aréstegui anunció la presentación d'esta proposición.
Nun tapeció la so curiosidá en conocer la postura al respeuto de la Federación Socialista Asturiana (FSA), de la que dixo tener constancia de que se comprometió a apoyar la especialidá nun conceyu cola Platafomra de Profesores de Llingua Asturiana. "Si'l so grupu políticu vota a la escontra, que diga por qué miente", añadió.

xunta ordinaria

Ta convocada una nueva xunta ordinaria del Colectivu de Docentes de Llingua Asturiana pal próximu vienres 22 de mayu a les 18.30 hores nel local del Conceyu Abiertu d'Uviéu.

La xunta ta abierta a tolos maestros/maestres y profesores de llingua asturiana que formen parte dafechu de la Plataforma de docentes de Llingua Asturiana.

El PP propón que se reconoza la especialidá docente en Llingua Asturiana

Fonte: Les Noticies

El Grupo Parllamentariu Popular presentó ayeri na Xunta Xeneral del Principáu una proposición non de llei pa que'l Gobiernu autonómicu cree la especialidá de Llingua Asturiana y Gallego-Asturianu d'Infantil, Primaria y Secundaria. Los populares quieren, con esta midida, que los profesores d'estes materies cuenten «con garantíes llaborales y profesionales iguales que les de los demás».

Los diputaos populares Joaquín Aréstegui y Emilio Pérez Cueva dieron una rueda de prensa pa esplicar esta medida -qu'esixíen tanto la Plataforma de Profesores de Llingua Asturiana como los sindicatos d'enseñanza- y dixeron que nun entienden «por qué'l profesoráu d'asturianu nun forma parte de la plantiya orgánica», onde recordaron que sí s'incluyeron toles otres materies. Criticaron que, d'esta manera, los profesores d'asturianu tán «condenaos a ser interinos, ensin opción a sacar plaza nuna oposición o a presentase a concursos de tresllaos».

Pérez Cueva pidió'l reconocimientu de la especialidá, pero tamién la correspondiente convocatoria d'oposiciones y concursu de tresllaos, y pa ello esixeron que la Conseyería y el Ministeriu d'Educación lleguen a un alcuerdu nesi terrén. Aréstegui recordó'l Plan de Normalización 2005-2007, que garantizaba la enseñanza del asturianu y planteaba la posibilidá d'un estudiu xurídicu previu al reconocimientu de la especialidá, pa señalar qu'hasta agora «nun se fixo nada». De la mesma manera, los dos diputaos criticaron la postura d'IX-Bloque, por formar parte del Gobiernu y nun impulsar nenguna iniciativa nesti aspectu.

Primer Sestaferia del Profesoráu de Llingua Asturiana

El Centru de Profesores y Recursos d'Avilés acaba facer públicu'l programa de la "Primer Sestaferia del Profesoráu de Llingua Asturiana", una actividá que xirará al rodiu del desarrollu curricular y didácticu de l'asignatura, y que tendrá llugar los díes 5 y 6 de xunu.
Ente les actividaes programaes pa estes xornaes rescamplen les dedicaes a los materiales curriculares pa les diferentes estayes como: "Currículu Primaria", a cargu de Severino Antuña y Maite González; "Niveles de concrección del Currículu de Secundaria" por Genaro A. Mejido; y "Currículu d'adultos" a cargu de Luis Manuel Menéndez Sánchez.
No que cinca a los materiales didácticos, trataránse diferentes temes como l'usu de les nueves tecnoloxíes nel aula, el trabayu del comic nes clases de llingua asturiana o'l tratamientu y usos del cine y la televisión.
El plazu de matrícula será hasta'l 29 de mayu.

La Xunta convoca una concentración reivindicativa de l'asignatura d'asturianu

Fonte: asturies.com

La XDLA llama a concentrase'l prósimu martes 31 de marzu a les 16:00 delantre la Escuela de Maxisteriu, nel Campus de Llamaquique de la Universidá d’Uviéu coincidiendo cola votación decisiva sobre la llingua asturiana.

El próximu martes 31 de marzu la Xunta d’Escuela de Maxisteriu va aconceyar con un únicu puntu de debate, la presencia de la llingua asturiana nos nuevos planes d’estudios qu’han aprobase pal procesu de converxencia del marcu européu de Bolonia.

La dirección de la Escuela de Maxisteriu yá llevó a votación, el 29 de xineru, la so primer propuesta de planes d’estudiu qu’escluíen a los estudios de llingua asturiana y dexaben ensin posibilidá de formación a los futuros mayestros y mayestres d’asturianu. D’aquella, la so propuesta foi refugada por una mayoría amplísima 48 contra 23. Lo que nun foi abondo pa que la directora Gloria Tellez presentara la dimisión, nin tan siquiera que reconsiderara la so posición no tocante al asturianu.

Mesmo’l Rector Vicente Gotor como’l Conseyeru d’Educación Iglesias Riopedre defendieron la necesidá d’incluir los estudios de llingua asturiana nos nuevos planes. Según la XPDL, de nun lo facer "la Escuela de Maxisteriu declararíase insumisa a la llexislación vixente porque La Llei 1/98 d’Usu y Promoción del Asturianu recueye nel so capítulu d’enseñanza’l derechu al estudiu del asturianu nel sistema educativu y qu’ha ser la Universidá d’Uviéu la qu’ha garantizar pa ello la formación de los docentes de Llingua Asturiana".

La Xunta recuerda tamién que "el Currículu pa la Educación Primaria n’Asturies afita la presencia de l’asignatura voluntaria de Llingua Asturiana qu’angüañu escueyen voluntariamente más de vente mil escolinos y escolines".

En definitiva pa la organización de defensa del idioma "a creación d’una Mención de Llingua Asturiana que permita la formación de los futuros mayestros y mayestres de Llingua Asturiana.
La presencia d’asignatures de Llingua Asturiana nos estudios comunes d’Educación Infantil y Primaria y que permita la formación mínima necesaria pa que cuanquier futuru mayestru o mayestra pueda desarrollar la so actividá docente na realidá sociollingüística d’Asturies, garantizando la igualdá de derechos llingüísticos y educativos de los neños y neñes falantes d’asturianu".

Un informe xurídicu asegura que «nun hai estorbu» pa crear la especialidá de Llingua

Fonte: Les Noticies

IVÁN G. FERNÁNDEZ
Nel añu 2001 la Viceconseyería d'Educación encargó un informe xuridicu al catedráticu de Derechu Alministrativu de la Universidá d'Uviéu Leopoldo Tolivar Alas y a Míriam Cueto, profesora titular de la mesma asignatura y agora directora xeneral d'Universidaes. Nél analizábase si yera viable xuridicamente que los profesores d'Asturianu y Gallego-Asturianu, n'Educación Primaria y Secundaria, pudieren ocupar puestos de plantiya orgánica del personal docente na Alministración. Nes conclusiones del informe dizse qu'«al nuestru xuiciu nun hai estorbu xurídicu nengún pa que'l Principáu d'Asturies», desque se fixe nel currículum pa la Educación Primaria y Secundaria la especialidá de Llingua Asturiana, «cree -al traviés de les rellaciones de puestos de trabayu del personal docente-, puestos destinaos a impartir Llingua Asturiana». Amás, asegúrase que l'aprobación de les rellaciones de puestos de trabayu «correspuende al Conseyu de Gobiernu» conforme al artículu 30 de la Llei 3/85, d'ordenación de la función pública de l'Alministración. Desque se creen esos puestos de trabayu, «tien que se proceder a la so provisión» y que, por tener unes característiques especiales, «tienen que se facer por concursu reguláu» polos órganos de les correspondientes comunidaes autónomes. El documentu destaca, nesti sentíu, que ye necesario que'l funcionamientu de los puestos de trabayu tea previstu na planificación escolar, y que s'axudiquen esos puestos por centros, con indicación de la especialidá. Amás, ha ser l'Alministración «la encargada de fixar los requisitos» pa poder impartir la especialidá d'Asturianu n'Educación Primaria y Secundaria porque, tres de la tresferencia de competencies, «consideramos que yá nun ye necesariu'l conveniu col Ministeriu d'Educación y Ciencia». Según se pue lleer nel informe xurídicu, «creemos oportuno» ellaborar un Decretu que fixe los requisitos pa que s'estableza la enseñanza de la Llingua Asturiana nos centros docentes y los de capacitación del profesoráu y, que «había sustituir» al Decretu 89/94 que regula los requisitos pa la inscripción en Rexistru de Certificaciones de Capacitación de Llingua Asturiana.

El documentu, al que tuvo accesu LES NOTICIES, fíxose cuando taba vixente la Llei Orgánica d'Ordenación Xeneral del Sistema Educativu. Sicasí, quedó en papel moyao porque l'Alministración nunca lu aplicó. L'informe destaca que, según l'artículu 8 del Real Decretu 895/89, establezse que'l Ministeriu d'Educación y Ciencia o los órganos correspondientes de les comunidaes autónomes con competencies asumíes van poder incorporar puestos de trabayu de carácter docente según la programación de les enseñances que -nel ámbitu de les sos respectives competencies- establezan. Amás, los requisitos específicos pal desempeñu «van determinase nos puestos de trabayu». Los participantes nos concursos de tresllaos han cumplir los requisitos xenerales y específicos que s'establezan en cada convocatoria d'alcuerdu colo que determinen les plantiyes orgániques.


Conveniu marcu
Como una continuación del estudiu xurídicu del 2001 que nun se llegó a aplicar, nel añu 2005 firmóse tamién un Protocolu marcu de collaboración ente'l Gobiernu y la Universidá d'Uviéu pa facer otru estudiu xurídicu sobre la Llingua Asturiana nel sistema educativu. El documentu taba xustificáu nel Plan de Normalización Social del Asturianu 2005-2007. Sicasí, el proyectu de collaboración nun foi más allá de la firma.

La Plataforma de Docentes de Llingua Asturiana va aconceyar cola ALLA y Valledor

Fonte: Asturies.com

La recién creada Plataforma de Docentes de Llingua Asturiana, colectivu qu’agrupa a bona parte de los maestros d'Educación Primaria y profesores de Secundaria d'asturianu y gallego-asturiano, va aconceyar esti xueves cola Academia de la Llingua y col diputáu d’IX-BA-LV, Francisco Javier García Valledor, col oxetivu de treslladar el “sentir de la Plataforma tocante a la precaria situación de l'asignatura y el profesoráu d'asturianu y fala eo-naviega”.

Según la Plataforma, dientro de les sos primeres acciones ta “entamar una ronda de contactos pa tresllada-yos a los axentes sociales (partíos, sindicatos, instituciones y asociaciones) el sentir de la Plataforma tocante a la precaria situación de l'asignatura y el profesoráu d'asturianu y fala eo-naviega”. Asina tán concertaes “pa esti mesmu xueves dos entrevistes cola Academia de la Llingua Asturiana y el parlamentariu d'IX Francisco Javier García Valledor”.

La principal demanda del colectivu ye “la creación de les especialidaes de llingua asturiana y gallego-asturianu”, lo que supondría que los aspirantes que superasen el procesu de concursu oposición que s'aplica nel restu de les especialidaes formaríen parte de la plantiya de funcionarios docentes.

La Plataforma de Docentes califica de decepcionante la so reunión con Alberto Muñoz

Fonte: Les Noticies

La Plataforma de Docentes d'Asturianu, acabante constituise, reunióse ayeri miércoles 11 de mayu con Alberto Muñoz, Director Xeneral de Recursos Humanos de la Conseyería d'Educación y Ciencia. Los docentes de llingua asturiana planteáron-y al director xeneral el so parecer sobre cómo habría normalizase la enseñanza de la llingua asturiana y gallego-asturianu, asegurándo-y que la única manera habría pasar pela creación y la inclusión d'una especialidá de llingua asturiana dientro del catálogu de puestos de trabayu nes plantiyes orgániques de los centros educativos, convocatoria d'oposiciones y, finalmente, concursu de tresllaos.

Alberto Muñoz reconoció qu'esta fórmula que presentaba la Plataforma de Docentes d'Asturianu «yera la correcta», anque insistió en que la Conseyería (que diba tener que ponese d'alcuerdu cola Universidá d'Uviéu y el Ministeriu d'Educación) «nun podía crear la especialidá puesto que la llingua asturiana, nin el gallego-asturianu, nun son llingües oficiales».
La Plataforma de Docentes d'Asturianu nun aceptó esta esplicación, sacando a colación informes xurídicos qu'alvierten de la posibilidá de crear esta especialidá independientemente de que l'asturianu sía oficial o non, y recordáron-y al técnicu de la Conseyería «que nin el llatín nin l'inglés yeren llingües oficiales n'Asturies y que, con too y con eso, impatíense asignatures d'esta disciplina abellugaes baxo una especialidá».
Por too y por eso, la Plataforma, que se va reunir güei cola Academia de la Llingua Asturiana y col portavoz del Grupu Parlamentariu d'Izquierda Xunida na Xunta Xeneral del Principáu, va demandar la creación d'una especialidá de llingua asturiana y gallegu-asturianu «que nun dexe albentestate y na precariedá perpetua al profesoráu d'estes dos disciplines». Hai que recordar qu'una y buenes desaparecen les plantilles funcionales (onde abellugaba'l profesoráu de llingua asturiana y que'l Ministeriu d'Educación consideró d'illegales) namás queden les plantilles orgániques, onde ta'l profesoráu de les distintes especialidaes. Pa solventar esta situación, que dexaba in albis al profesoráu d'asturianu, la Conseyería d'Educación baraxó cambiar el nome a les funcionales, pa caltener l'ambigüedá con una simple operación cosmética, pero finalmente decidió que namás va haber plantilles orgániques y un cuerpu d'interinos, onde taría'l profesoráu de llingua asturiana.

La especialidá d'asturianu pue crease "si se quier"

Fonte: Les Noticies

I. G. F.
La sentencia recién del Tribunal Supremu, que declaraba illegales les plantiyes funcionales de docentes, dexó nun llimbu llegal a los maestros y profesores qu'imparten les asignatures de Llingua Asturiana y Gallego-Asturianu, y qu'hasta agora exercíen dientro d'esi formatu.

Pal colectivu de docentes d'Asturianu -qu'acaben de constituise nuna plataforma- ye «necesario» que se dignifique la situación llaboral irregular de los maestros d'Asturianu y que-yos reconozan los mesmos derechos y deberes qu'a los demás docentes d'otres especialidaes. Amás, esixen que se cumpla la llei onde se reconoz que los escolinos qu'estudien Asturianu tengan la mesma formación que los demás «y que nunca se llegó a aplicar». La Llei 1/98 d'Usu y Promoción del Asturianu afita nel so apartáu d'Enseñanza, artículu 10, que «nel exerciciu de les sos competencies, el Principáu d'Asturies va garantizar la enseñanza del Asturianu en tolos niveles y graos, respetando, sicasí, la voluntariedá del so aprendizaxe. En tou casu, el bable/asturianu va tener que ser impartío dientro del horariu escolar y va ser considerao como materia integrante del currículum».

Otra de les demandes de la Plataforma de Docentes d'Asturianu ye «la creación y la inclusión» de les especialidaes de Llingua Asturiana y de Gallego-Asturianu nel catálogu de puestos de trabayu nes plantiyes orgániques de los centros, la convocatoria d'oposiciones y del concursu de tresllaos. Por cuenta d'esti discutiniu, l'Alministración salió al pasu díes atrás, asegurando que les places d'Asturianu, pa tar dientro d'eses plantiyes, «tienen que ser especialidaes reconocíes pol Ministeriu d'Educación y Ciencia» y la especialidá d'Asturianu nun ta reconocida como tal. Amás, el Gobiernu aclarió que como'l concursu de tresllaos «ye nacional, polo tanto han ser especialidaes reconocíes a nivel nacional». Lo qu'ún se podía preguntar ye cómo se pue crear entós la especialidá de profesor d'Asturianu. Esti periódicu treslladó la cuestión al catedráticu de Derechu Alministrativu de la Universidá d'Uviéu Leopoldo Tolivar Alas, al que-y encargaren nel añu 2001, xunto a Miriam Cueto, directora xeneral d'Universidades na actualidá, facer un estudiu xurídicu pa evaluar la posibilidá llegal de la creación de la especialidá de profesor de Llingua Asturiana. Según Tolivar Alas, la solución taría en que les partes implicaes -l'Alministración, la Universidá y el Ministeriu d'Educación- «se punxeren d'alcuerdu nesta cuestión. Y, si se quier, pue ser posible».

Ronda d'entrevistes

El pasáu sábadu 7 de febreru constituyóse definitivamente la Plataforma de Docentes de Llingua Asturiana, vertebrada dende los principios que se esponíen na primer entrada d'esti blog.
Dientro de les primeres acciones de la Plataforma ta entamar una ronda de contactos pa tresllada-yos a los axentes sociales (partíos, sindicatos, instituciones y asociaciones) el sentir de la Plataforma tocante a la precaria situación de l'asignatura y el profesoráu d'asturianu y fala eo-naviega.
Asina tán concertaes pa esti mesmu xueves dos entrevistes cola Academia de la Llingua Asturiana y el parlamentariu d'IX Francisco Javier García Valledor.

xunta fundacional

El próximu sábadu 7 de febreru a les 16.00 hores, dos hores enantes de la manifestación convocada pola Xunta pola Defensa de la Llingua, va tener llugar na Biblioteca d'El Fontán n'Uviéu, la xunta fundacional del Colectivu de Docentes de Llingua Asturiana.

La xunta tará abierta a tolos docentes d'asturianu o gallego-asturianu que quieran participar d'esti proyectu coletivu qu'entamará cola llectura y aprobación de los estatutos y l'acta fundacional del colectivu.

La Plataforma de Docentes d'Asturianu esixe a l'Alministración que convoque oposiciones

Fonte: Les Noticies

IVÁN G. FERNÁNDEZ

Los profesores y maestros d'Asturianu y Gallego-Asturianu, acaben d'axuntase nuna plataforma pa reivindicar que-yos dean un tratu igual qu'al restu de la plantiya de docentes d'Asturies.

La Plataforma de Docentes d'Asturianu axuntóse tres de conocese la sentencia del Tribunal Supremu onde se declara contraria a derechu la existencia de les plantiyes funcionales n'educación y se considera illegal la regulación de la figura de sobrantes d'horariu y de les especialidaes afines. A pesar de que'l Conseyu Escolar del Estáu -órganu cimeru de representación de la comunidá educativa- dio'l preste pa la creación de la especialidá de Llingua Asturiana y Gallego-Asturianu, y de que dellos organismos europeos -como'l Conseyu d'Europa o la Unesco- solicitaren una mayor protección pal asturianu, les places de l'asignatura de Llingua siguíen ensin tar na plantiya orgánica de los centros educativos.

Según la Plataforma de Docentes d'Asturianu, cola desaparición de les plantiyes funcionales y el pasu de les places a la plantiya orgánica, la situación pa los maestros y profesores d'Asturianu y Gallego-Asturianu cambia d'una manera irreversible. Por eso esta agrupación «esixe'l compromisu» de les fuerces sindicales, de los partíos políticos y de la sociedá civil asturiana pa que s'axunten a esta petición pa dignificar la situación del idioma asturianu nel sistema educativu y dar la oportunidá de que los docentes sigan exerciendo'l so trabayu.


Reivindicación
Pa dignificar l'idioma asturianu nel sistema educativu, la plataforma pide «la creación y la inclusión» de les especialidaes de Llingua Asturiana y de Gallego-Asturianu nel catálogu de puestos de trabayu nes plantiyes orgániques de los centros, porque, amás, diba ser «un pasu importante» pa la situación d'allegalidá de l'asignatura. Tamién ven conveniente la convocatoria d'oposiciones porque «garantiza la llexítima demanda de los trabayadores» que ven amenazaos los sos puestos de trabayu énte'l cambiu d'estatus y d'indefinición nel que s'alcuentra esti colectivu Amás, la convocatoria d'oposiciones «garantiza» un accesu llimpiu y oxetivu pa ocupar places de trabayu públicu y asegúrase asina la calidá de la enseñanza. P'acabar, otra de les peticiones del colectivu de docentes d'Asturianu ye la convocatoria del concursu de tresllaos de la especialidá porque «se garantiza»'l derechu de cualquier funcionariu de carrera a concursar nesta especialidá nes mesmes condiciones que'l restu d'especialidaes. D'esta manera tamién diba a iguase'l problema de los funcionarios de secundaria que tán habilitaos y quieren cambiar d'especialidá y que na actualidá tienen que facer oposición pa qu'esi cambiu pueda ser posible. La Plataforma de Docentes d'Asturianu quier destacar qu'esti ye l'orde amañosu porque, «de nun ser asina y pasar a reivindicar namás la catalogación-concursu», podría provocar la desaparición d'un bon piñu de puestos de trabayu ensin que los trabayadores tuvieren la posibilidá de siguir exerciendo'l so llabor docente y que nun s'accediera a estos puestos de trabayu como nes demás especialidaes.



L'Alministración
Nesti sentíu, Ana Rosa Migoya, conseyera d'Alministraciones Públiques y portavoz del Gobiernu, quixo aclariar nuna rueda de prensa la situación de los profesores d'Asturianu na plantiya docente. Migoya comentó que les places de la plantiya son los 9.350 «qu'anunciemos y ehí nun tán los profesores d'Asturianu». La conseyera d'Alministraciones Públiques y portavoz del Gobiernu aclarió que los profesores de Llingua nun taben dientro d'eses places porque «tienen que ser especialidaes reconocíes pol Ministeriu d'Educación y Ciencia y l'Asturianu nun lo ta». D'otru llau, la responsable socialista declaró que la diferencia ente eses 9.350 places y les 11.121 que tán presupuestaes «correspuende a contrataciones de carácter interín». La conseyera dixo qu'«estes places son pa cubrir necesidaes como la contratación de llaborales, o como son les necesidaes que puedan aparecer a última hora

Convocatoria

Ta convocada una nueva xunta de docentes esti vienres 27 de febreru a les seis y media la tarde nel Salón d'Actos del Institutu Alfonso II d'Uviéu.

Problemática en prensa

El Principado deja fuera de la nueva plantilla docente a más de 300 profesores de asturiano

El Gobierno asturiano aprueba 11.121 plazas docentes entre fijos e interinos

Contacta

Si yes docente d'asturianu o fala eo-naviega na E. Primaria o Secundaria y quies inscribite na Plataforma ponte en contactu con nós. Cuantos más seamos más fuerza podemos exercer pa cambiar les coses.

plataforma_asturianu@hotmail.com

Declaración d'intenciones

A raíz de la sentencia del Tribunal Supremu qu’obliga a la desaparición de les plantiyes funcionales y pasar les places a plantiya orgánica, la situación pa los docentes que ponen escuela d’asturianu y de gallegu-asturianu cambia d’una manera irreversible. Y puede haber cambios positivos o cambios negativos dependiendo de la estratexa que’l colectivu de docentes de llingua asturiana tome. Por eso, la plataforma de docentes d’asturianu desiximos el compromisu de les fuerces sindicales, de los partíos políticos y de la sociedá civil asturiana, a que s’axunten conxuntamente a esta petición, que nun pretende otro que dignificar la situación del idioma asturianu nel sistema educativu y dar la oportunidá de que los docentes sigan exerciendo’l so trabayu nun númberu bien significativu de casos.

Los pasos a siguir, que proponemos y que depués vamos xustificar, sedríen:

1) Creación y inclusión de les especialidaes de Llingua Asturiana y de Gallegu-asturianu nel Catálogu de puestos de trabayu.

2) Dotación de places de llingua asturiana nes plantiyes orgániques de tolos centros.

3) Convocatoria d’oposiciones.

4) Concursu de tresllaos.

1) y 2) La creación de la especialidá y la inclusión nes plantiyes orgániques sedría un pasu importante de dignificación de los puestos de trabayu y de la situación d’allegalidá de l’asignatura nel sistema educativu asturianu (públicu y concertáu). Nun ye solo lo más beneficioso pal idioma, tamién tien que tener repercusiones llaborales mui positives al crease un númberu mayor de places, con menos medies xornaes y itinerancies, al empar d’un grau de normalidá de l’asignatura que nun esiste anguaño.

3) Convocatoria d’oposiciones: porque se garantiza la lexítima demanda de los trabayadores que ven amenazaos los sos puestos de trabayu ante’l cambiu d’estatus y d’indefinición na que nos alcontramos. Recordamos qu’a fecha de güei los profesores qu’impartimos la materia nun figuramos oficialmente na plantiya orgánica de nengún centru porque l’alministración yá avisó de que nun pueden tar. Porque tamién garantiza un accesu llimpiu, oxetivu y universal pa ocupar places de trabayu públicu y asegura calidá del enseñu.

4) Concursu de tresllaos: porque se garantiza’l derechu de cualquier funcionariu de carrera a concursar a esta especialidá, en condiciones similares al restu de les especialidaes. Igualmente, en secundaria resolveríase una anomalía acumulada nestos años que ye la situación pola qu’un funcionariu pa cambiar d’especialidá tien que superar la oposición de cambiu d’especialidá y non como se da na actualidá onde nun hai tal.

Y insistimos qu’esti ye l’orde amañosu porque de nun ser asina y pasar a vindicar solo la catalogación - concursu, podríemos provocar que desapaecieren un montonáu de puestos de trabayos sin que los trabayadores tuvieren la oportunidá, como n’otres situaciones de conflictos llaborales, de siguir exerciciendo’l so llabor docente y que nun s’accediera a esos puestos de trabayu como nel restu d’especialidaes.

Ante esta situación de dispersión de pareceres, d’estratexa y d’idees pidimos cordura, sabiduría y consensu pa superar esta crisis, esta indefinición y esta indefensión na que tamos.

Nun val parchiar el problema (que sigue tando) de que les coses sigan como tán, porque hai sentencia qu’obliga al gobiernu a organizalo d’otra manera. Tampoco val pidir la degradación del colectivu a categoría de personal llaboral porque mermaría los mínimos derechos que tien el colectivu dientro del sistema.

Poro, pidimos que s’entame un procesu de negociación cola Conseyería d’Educación, onde’l colectivu d’interinos d’asturianu y gallegu-asturianu de Primaria y Secundaria tenga presencia directa al empar de los sindicatos. Pidímos-y tamién a los nuestros representantes sindicales coherencia interna y esterna nel procesu que s’ha d’entamar. Esixímos-y, igualmente, a la Conseyería d’Educación del Principáu d’Asturies que guarde nel caxón les actitúes mostraes en procesos anteriores y tenga la valentía d’almitir una realidá sociollingüística imparable nel ámbitu educativu y dea soluciones razonables pa l’asignatura y pal so colectivu d’enseñantes.