El PP propón que se reconoza la especialidá docente en Llingua Asturiana

Fonte: Les Noticies

El Grupo Parllamentariu Popular presentó ayeri na Xunta Xeneral del Principáu una proposición non de llei pa que'l Gobiernu autonómicu cree la especialidá de Llingua Asturiana y Gallego-Asturianu d'Infantil, Primaria y Secundaria. Los populares quieren, con esta midida, que los profesores d'estes materies cuenten «con garantíes llaborales y profesionales iguales que les de los demás».

Los diputaos populares Joaquín Aréstegui y Emilio Pérez Cueva dieron una rueda de prensa pa esplicar esta medida -qu'esixíen tanto la Plataforma de Profesores de Llingua Asturiana como los sindicatos d'enseñanza- y dixeron que nun entienden «por qué'l profesoráu d'asturianu nun forma parte de la plantiya orgánica», onde recordaron que sí s'incluyeron toles otres materies. Criticaron que, d'esta manera, los profesores d'asturianu tán «condenaos a ser interinos, ensin opción a sacar plaza nuna oposición o a presentase a concursos de tresllaos».

Pérez Cueva pidió'l reconocimientu de la especialidá, pero tamién la correspondiente convocatoria d'oposiciones y concursu de tresllaos, y pa ello esixeron que la Conseyería y el Ministeriu d'Educación lleguen a un alcuerdu nesi terrén. Aréstegui recordó'l Plan de Normalización 2005-2007, que garantizaba la enseñanza del asturianu y planteaba la posibilidá d'un estudiu xurídicu previu al reconocimientu de la especialidá, pa señalar qu'hasta agora «nun se fixo nada». De la mesma manera, los dos diputaos criticaron la postura d'IX-Bloque, por formar parte del Gobiernu y nun impulsar nenguna iniciativa nesti aspectu.