SUATEA, Xunta pola Defensa de la Llingua, Bloque por Asturies y UNA llamentaron güei'l resultáu del debate sobre la especialidá d'asturianu na Xunta Xeneral, nel que s'alcordó pidir un estudiu xurídicu sobre l'asignatura
El Sindicatu Unitariu Autónomu de Trabayadores de la Enseñanza d'Asturies (Suatea) tachó güei de "circu" y "ópera bufa" l'aprobación unánime güei na Xunta'l Parlamentu de la moción del PP que pidía al Estáu la reconocencia de la especialidá docente de Llingua Asturiana y acabó enmendada como solicitú d'un estudiu sobre tal posibilidá. Pela so parte, el Bloque por Asturies, como integrante d'IU-BA-Verdes tachó d'hipócrita l'actitú del PP al aceptar les enmiendes del PSOE, en llugar de aprobala col apoyu suficiente ofrecíu por esta coalición.
El sindicatu recordó qu'enantes de les eleiciones europees "valoró mui positivamente la iniciativa del Partíu Popular", y mostró la so confianza en que "la coherencia tuviera penriba de les rivalidaes polítiques, y qu'aquellos que teóricamente mos representen lo ficieren de verdá, aprobando la proposición sobre la Llingua Asturiana y el Gallego-Asturiano".
"Güei nel Parlamentu Asturianu representóse una ópera bufa que dexó bien a les clares que lo que se dixo nel so día nun foi más qu'un trucu electoralista", opinó la organización nun comunicáu. "Toos trayíen la lleición deprendía de casa hasta'l puntu de que la cama redonda final de los trés partíos paecía inevitable. El resultáu nun foi otru q'un apoyu unánime a una enmienda del PSOE que recoyía puntu por puntu les imprecisiones que sobre l'asturianu tan nel pactu de gobiernu. ¿Formaráse un gobiernu de concentración?. Paez q'empiecen a reconocese y que toos son los mesmos", entrugó'l sindicatu.
Suatea recordó qu'otros "organismos europeos solicitaron mayor proteición pa la llingua asturiana; que, hai agora un añu, 'El Conseyu Escolar del Estáu' (muérganu máximu de representación de la comunidá educativa del estáu español) aprobó, a instancies de Suatea la creación de la especialidá de Llingua Asturiana y Gallego-Asturiano, y hasta la Universidá apostó pola llingua en varies ocasiones colos cursos d'espertos y especialistes, o agora cola especialidá dientro de los planes d'estudiu". "Los nuesos políticos nun s'enteren, ¿por inorancia, por inconsciencia o por mala lleche?", acaben.
"ESPECTÁCULU BOCHORNOSU"
La Xunta pola Defensa de la Llingua Asturiana tamién emitió comunicáu en que califica de "bochornosa" la situación vivida na Xunta Xeneral. La organización, que valoró, nel momentu de la so presentación, como mui positiva la proposición non de llei presentada pol Partíu Polpular pa la creación de la especialidá de Llingua Asturiana nel sistema educativu, llamentó asistir na sesión plenaria d’esta mesma mañana "al espectáculu bochornosu amosáu polos dos partíos mayoritarios nel debate de la proposición; d’una banda’l PSOE que presentó dos enmiendes dirixíes esclusívamente a dexar la proposición ensin efectu y convertila en papel moyáu y d’otra banda’l Partíu Popular, que fexo un exerciciu de cinismu políticu vergonzosu y intolerable". Acordies cola xunta, "nun tien sentíu tien que se vincule la creación de la especialidá de Llingua Asturiana a la confección d’un estudiu xurídicu cuando yá hai un estudiu fechu -a encargu d’esti mesmu gobiernu- que fai una valoración favorable a la creación de la especialidá, y con ello vuelve a rescamplar la oposición frontal del PSOE a cualquier avance hacia la dignificación de la llingua asturiana, incluso en casos como esti nos que nun pon reparu n’enfrentase a l’aplicación de sentencies xudiciales". La organización remembra como "una sentencia reciente del Tribunal Supremu calificaba como illegales les plantíes funcionales de docentes y desixía la so inclusión na plantía orgánica de los centros, lo qu’implica necesariamente la creación de la especialidá pal profesoráu de llingua asturiana".
Tocantes al PP, la Xunta condena que "teniendo votos suficientes p’aprobar la so propia proposición decide, in extremis, dexala ensin efectu incorporando les enmiendes presentaes pol PSOE. Evidenciando de manera penosa que nunca esistió per parte del grupu popular intención de collaborar na dignificación de la llingua asturiana, nin esiste n’ellos molición nenguna pola situación llaboral marxinal na tienen qu’exercer el profesoráu d’asturianu.
El PP decidió retirar la so propia proposición non de llei énte’l riesgu de que fuera aprobada y pudiera valir pa meyorar la presencia de la llingua asturiana nel sistema educativu".
La Xunta pola Defensa de la Llingua Asturiana "condena esta instrumentalización de la llingua asturiana como elementu de confrontación política y valora l’exemplu de xenerosidá política amosáu por Izquierda Xunida al ufrir los sos votos ensin condiciones al Partíu Popular" anque "llama a la reflexón n’Izquierda Xunida sobre la so participación nun gobiernu qu’agrede sistemáticamente los derechos llingüísticos más elementales y que sigue col oxetivu claru d’esterminar el patrimoniu llingüísticu asturianu nel menor plazu posible".
"HIPÓCRITES"
Pela so parte, el Bloque d'Asturies, integrante d'IU-BA-Verdes entrugó "agora quiénes sons los fariseos y los hipócrites", en referencia a los diputaos del PP.
"Tamos asustaos col esperpentu del Partíu Popular na votación de la especialidá d'Asturianu. Dempués de facer populismu y xugar colos maestros d'asturianu y cola dignificación de l'asignatura, nun tienen nenguna vergoña en refugar los votos del grupu parlamentariu de Izquierda Xunida-Bloque por Asturies-Verdes pa sacar alantre una proposición non de llei qu'ellos mesmos presentaron", señaló'l testu.
Esplicó de la mesma manera'l Bloque que'l so grupu parlamentariu "presentó dos enmiendes qu'meyoraben la propuesta inicial del PP, como son la inclusión del Bachilleratu y llamar l'asignatura pol so nome, llingua asturiana, y éstos refugáronla". "Lo realmente surrealista", continuó'l comunicáu "ye ver cómo depués de retirar les nuestres enmiendes y tar dispuestos a votar la qu'ellos presentaron, el PP refugó l'apoyu d'IX-Bloque-Los Verdes p'aprobar una enmienda propia. Les preguntes son ¿Quiénes son los fariseos y los hipócrites? y ¿pue ser alternativa de Gobiernu una fuerza que nun vota les sos propies propuestes? Nun sabemos cúal va ser el próximu capítulu pero sí'll final y quién va perder, la llingua asturiana", señaló la formación.
Pal Bloque "a estes altures ta claro cuála ye la seriedá del PP col tema de la llingua asturiana, ta claro que son parte del problema y non de la solución, que namás faen oportunismu políticu, ficiéronlu col estatutu, nes elecciones y tamos seguros que van siguir faciéndolu".
A lo último, la formación esplicó que "evidentemente, con esti cambiu de postura del Partíu Popular, vímonos na obligación de votar a favor y nun ser la única fuerza política que se niega a pidir un estudiu xurídicu, dalgo que nun diba entender naide que quiera un futuru meyor pa la llingua asturiana".
"ENGAÑU IMPRESENTABLE"
Pel so llau educación d’Unidá Nacionalista Asturiana consideró que l’actitú de los grupos políticos con representación nel parlamentu asturianu tocante a la creación de la especialidá d’asturianu ye “un engañu impresentable” en tanto que representa “una maniobra política que nun fai más que poner torgues a la concesión d’unos derechos llaborales incuestionables siguiendo la política que meyor se-y da a la Federación Socialista Asturiana, la de impedir sistemáticamente cualesquier avance nos derechos llingüísticos n’Asturies”.
La formación nacionalista recordó que la proposición pactada polos grupos PSOE y PP “ye más de lo mesmo y nun busca otro que ganar tiempu cola aprobación d’unes midíes que non solo yá taben presentes nel pactu de Gobiernu sinón qu’amás yá fueron tomaes hai unos años pol propiu executivu”.
Asina, UNA defín como “alloriante” qu’un de los puntos del alcuerdu tomáu ente les dos fuerces polítiques seya l’encargu d’un informe sobre la posibilidá de creación de la especialidá “cuando saben de sobra qu’esi informe yá esiste, porque ellos mesmos lu encargaron, y que diz claramente que nun hai pega pa la creación de la especialidá”.
UNA tamién llamenta nel so comunicáu "la cobardía del grupu parlamentariu d’IU-BA que, formando parte del pactu de Gobiernu nun ye quien a presionar a los sos socios pa que garanticen una de les cuestiones fundamentales pa la sobrevivencia de la llingua d’Asturies, la so presencia digna dientro del sistema educativu y tán presos d’un pautu de gobiernu inoperativu, indignu y denigrante”.
